Skákæfingar þriðjudaga kl.14-15:30 í vetur

Það hefur verið ákveðið að byrja aftur með skákæfingar og þá í Þjórsárveri á þriðjudögum kl.14-15:30 eða strax eftir skóla. Þetta yrðu æfingar fyrir þá sem kunna mannganginn eða hafa áður verið á æfingum. 

Fyrsta æfingin verður þriðjudaginn 12.jan kl.14 í Þjórsárveri.

 

Ég mun skoða að vera með kynningu fyrir yngri börnin og þá sem ekki hafa lært mannganginn en verð ekki með vikulegar æfingar fyrir þann hóp. Ég hvet foreldra hinsvegar til að kenna börnum sínum mannganginn - það vinnst best heima við eldhúsborðið.

 

Hafið samband ef einhverjar spurningar vakna. Það eru nokkur skákmót framundan, m.a. er stefnt á Skólaskákmót Flóaskóla í feb/mar, Héraðsmót HSK í feb. ofl.

 

Ég minni einnig á chesskids.com síðuna til að æfa sig. Hafið samband ef ykkur vantar aðgang þangað inn.

 

Hægt er að fylgjast með fréttum af skákstarfinu hér á þessari síðu - og skrá sig á póstlista.

Nýársskákmót Þjótanda 2016 - úrslit

Nýársmót Þjótanda 2016 var haldið laugardaginn 2.jan kl.10-12:30. Þáttaka var góð, 14 keppendur tefldu 7 umferðir á 7 borðum.

Úrslit - 3 efstu

1. Sverrir Unnarsson - 6 vinningar
2. Ágúst Valgarð Ólafsson - 6 vinningar
3. Þórbergur Hrafn Ólafsson - 5 vinningar

• Smelltu hér til að sjá nánar heildarúrslit.
• Hér má sjá úrslit aldursskipt á milli grunnskólabarna og fullorðinna.
• Hér má svo sjá myndir af mótinu.

Þetta var skemmtilegt mót - m.a. unnu grunnskólanemar nokkra úr hóp fullorðinna. Ágúst vann Sverri í annari umferð en tapaði svo í 5.umferð fyrir Þórbergi bróður sínum eftir að hafa fórnað hrók í mátssókn sem rann út í sandinn.

Hægt er að smella á einstakar umferðir undir History - m.a. er þetta fyrsta umferð.

Hér er hægt að skrá sig á póstlista og fá þannig tölvupóst af því helsta tengt floaskak.blog.is

 

Nýársskákmót Þjótanda 2016

ATH: Breytt staðsetning - mótið verður haldið í Þjórsárveri

Nýársskákmót Þjótanda 2016 verður haldið í Þjórsárveri laugardaginn 2.jan kl.10-12:30.
Tefldar verða 7 umferðir með Svissnesku kerfi með 10 min. umhugsunartíma á mann. Haldið verður utanum röðun keppanda í þremur flokkum:

1. Yngri - grunnskólanemar
2. Eldri - eldri er grunnskólanemar
3. Samtals (yngri+eldri)

Ekki er þörf á að skrá sig fyrirfram.

Nánari upplýsingar veitir Ágúst Valgarð í síma 860-1895

Skákin þroskar

Susan Polgar heldur úti sérstöku bloggi þar sem hún fjallar um hvernig skákiðkun barna hefur jákvæð og þroskandi áhrif: http://chessbenefits.blogspot.com/

Skákæfing í dag

Skákæfing hjá yngrihóp féll niður í dag vegna diskóteks í skólanum. Í eldri hóp litum við á 3 skákþrautir sem fjölluðu um að nota Drottninguna til að gaffla. Svo tefldum við sem hópur við tölvuna. Það er einföld leið til að læra hvert af öðru. Tölvan er með 10 styrkleika stig. Í dag unnum við stig 5, svo næst er það stig 6.

Íslandsmót barnaskólasveita 2015

Helgina 25-26 apríl fór fram Íslandsmót barnaskólasveita 2015 í Rimaskóla fyrir börn í 1-7 bekk.

Flóaskóli sendi tvær sveitir til þáttöku. Þetta var fjölmennt mót með 48 sveitum, fjögur börn í hverri sveit.

Tefldar voru alls 9 umferðir (5 á laugard, 4 á sunnud). 10|5 umhugsunartími eða 10min. og svo 5 sek. bætt við eftir hvern leik. Afar hentugur umhugsunartími því með þessu móti lenda menn seint í tímahraki - og langar skákir fá aukinn tíma.

Flóaskóli A var þannig skipuð (vinningar hvers borðs í sviga fyrir aftan):

1. Dagur Fannar Einarsson (4 1/2)
2. Sigurjón Óli Ágústsson (6)
3. Patrekur Máni Jónsson (7) (Sunnulækjarskóli)
4. Guðmundur Björgvin Guðmundsson (1) (Kerhólsskóli)

Flóaskóli A lenti í 19 sæti með 18 1/2 vinning samtals.

Flóaskóli B var þannig skipuð:

1. Sigurjón Reynisson (6)
2. Daði Kolviður Einarsson (3 1/2)
3. Guðbergur Davíð Ágústson (3 1/2)
4. Atli Hrafn Lárusson (3) (Kerhólsskóli)

Flóaskóli B lenti í 37 sæti með 16 vinninga samtals.

Hægt er að sjá nánari úrslit hér.

Eins og sést þá fengum við 3 keppendur að láni úr öðrum skólum.

Þetta var skemmtilegt mót og við stefnum klárlega að því að taka þátt aftur á næsta ári. Við skipun í sveitir að þessu sinni horfðum við til þess að hafa eina sveit sem væri skipuð börnum 4 bekk og yngri - því veitt eru sérstök verðlaun fyrir þá sveit skipuð 4 bekk og yngri sem nær bestum árangri. Eftir á að hyggja hefði verið betra að skipa sveitirnar eingöngu eftir styrkleika - t.d. að Sigurjón Reynisson hefði verið á 4 borði í Flóaskóli A sveit.

Þáttaka í þessu móti var góð æfing. Menn lærðu hvað það skiptir miklu máli að einbeita sér og tefla til sigurs. Einnig lentu sumir í því að patta andstæðing með gjör unnið tafl í höndunum. 

Það eflir áhuga og hvetur krakka til dáða að taka þátt í móti sem þessu. Við höldum því ótrauð áfram með skákæfingar og þáttöku í mótum eftir því sem tök eru á.

Hér má sjá nokkrar myndir af mótinu.

 

 

Íslandsmót barnaskólasveita

Íslandsmót barnaskólasveita í skák fer fram í Rimaskóla Grafarvogi dagana 25. og 26. apríl næstkomandi. Sjá nánar hér: http://www.skak.blog.is/blog/skak/entry/1691855/

 

Það er unnið að því að Flóaskóli sendi eina eða jafnvel tvær sveitir á mótið. Ég verð í sambandi við foreldra næstu daga til skrafs og ráðagerða.

2015 kjördæmismót suðurlands í skólaskák

2015 kjördæmismótið í skólaskák fór fram í Fischersetrinu föstudaginn 10.apríl kl.15. 13 keppendur tóku þátt í yngri flokk (1-7 bekkur) úr 4 skólum. Enginn keppandi keppti í eldri flokk. Tefldar voru 6 umferðir með 15.min umhugsunartíma.

Í fjórum efstu sætunum urðu:

1. Heiðar Óli Guðmundsson - Helluskóli - 5 vinningar.
2. Almar Máni Þorsteinsson - Helluskóli - 5 vinningar.
3. Katla Torfadóttir - Helluskóli - 4 vinningar.
4. Martin Srichakham - Helluskóli - 4 vinningar.

Smelltu hér til að skoða nákvæm úrslit.

Frá Flóaskóla tefldu Dagur Fannar, Sigurjón Óli, Daði Kolviður og Guðbergur Davíð. Allir áttur þeir góða spretti, unnu í einhver skipti keppendur sem þeim hefur ekki tekist að vinna áður, en töpuðu einnig niður unnum skákum eins og gengur. Dagur Fannar átti góðan dag að þessu sinni og náði 5 sæti í mótinu með 3 1/2 vinning. Sennilega hans besti árangur á skákmóti hér á suðurlandi hingað til. Dagur Fannar náði m.a. jafntefli við Heiðar Óla sem var vel af sér vikið.

Guðbergur Davíð var yngsti keppandinn, 6 ára. Hann gerði sér lítið fyrir og náði tveim vinningum, og var reyndar efstur í mótinu eftir tvær umferðir!

Hér má sjá nokkrar myndir frá mótinu.

 

Páskaeggjaskákmót 2015 - úrslit

Laugardaginn 28.mars var haldið páskaeggjaskákmót, en það heppnaðist ekki fyllilega þar sem það mættu bara tveir keppendur, Sigurjón frá Hurðarbaki og Aldís frá Jaðarkoti. Bæði veikindi og önnur forföll orsakaði þetta. Þau Sigurjón og Aldís tefldu nokkrar skákir og fengu svo páskaegg (sjá mynd).

Í samvinnu við Flóaskóla var gerð önnur tilraun til að halda páskaeggjaskákmót, það var ómögulegt að þurfa að skila öllu þessu súkkulaði! Þetta mót var haldið miðvikudaginn 8.apríl kl.12:30 - 13:45 eða á sama tíma og skákæfingar fyrir yngri hóp. Skákæfing hjá eldri hóp var felld niður. Vissulega var þetta knappur tími - en þáttaka var góð - 26 keppendur. Tefldar voru 7 min. skákir þannig að allir telfdu í einum hóp. Þó var haldið utanum úrslit aldursskipt í yngsta- mið og unglingastig (fylgt sömu skiptingu og er í Flóaskóla). Eftir 4 umferðir urðu úrslit í efstu sætum þessi:

Yngsta stig

1. Daði Einarsson - 3 1/2 vinningar
2. Sigurjón Reynisson - 2 vinningar
3. Soffía Náttsól - 1 1/2 vinningar

Miðstig

1. Sigurjón Óli Ágústsson - 4 vinningar
2. Sæþór Atli - 3 vinningar
3. Smári - 2 1/2 vinningar

Elstastig (unglingadeild)

1. Hannes Höskuldsson - 3 1/2 vinningar
2. Stefán - 3 vinningar
3. Hólmar - 3 vinningar

Það hefði verið betra að ná a.m.k. 5 umferðum - en því miður var ekki tími til þess. Mótið fór vel fram og teflt var af kappi. Allir keppendur fengu lítið páskaegg - og sá sem sigraði í hverjum flokki fékk svo stærra.

Yfir heildina voru úrslit í efstu sætum þessi:

1. Sigurjón Óli Ágústsson - 4 vinningar
2. Hannes Höskuldsson - 3 1/2 vinningar
3. Daði Einarsson - 3 1/2 vinningar 

Hér má sjá nokkrar myndir frá mótinu.

Páskaeggjamót Þjótanda 2015

Páskaeggjamót Þjótanda verður haldið laugardaginn 28.mars kl.16 í Þjórsárveri. Mótið er opið öllum börnum á grunnskólaaldri.

Gott er að skrá sig með því að smella hér - til að við getum áætlað hvað þarf að kaupa af páskaeggjum!

Teflt verður með a.m.k. 10 min. umhugsunartíma.

Allir þáttakendur fá lítið páskaegg - og verður aðeins stærra egg sem fyrstu verðlaun í eftirfarandi flokkum:

6-7 ára

8-9 ára

10-11 ára

12 ára og eldri

 

Nánari upplýsingar veitir Ágúst Valgarð í síma 860-1895