Jólapakkaskákmót Hugins

Jólapakkaskákmóti skákfélagsins Hugins verður haldið í Ráðhúsi Reykjavíkur kl.13 laugardaginn 20.des. Nánari upplýsingar og skráning hér:

http://skakhuginn.is/jolapakkamot-hugins-skraning-og-skradir-keppendur/

Ég ætla að fara á bíl - og er með nokkur sæti laus ef einhver vill far á mótið. Hafið samband í síma 860-1895 eða með tölvupósti. Mótekið tekur um 3.klst. Brottför frá Þjórsárveri kl.11:30. Áætluð heimkoma á milli kl.17 og 18.

Opna Rangæingamótið í skák 16 ára og yngri

Laugardaginn 22. Nóvember  Kl:11.00 verður Opna Rangæingamótið í skák fyrir 16 ára og yngri haldið í Safnaðarheimili Odda kirkju á Hellu.
Tefldar verða 5-6 umferðir (fer eftir þátttöku)  eftir monrad-kerfi og verður umhugsunartíminn 10 mín á keppanda í hverri skák.
Ungmennafélagið Hekla  sér um keppnishaldið og verður öllum keppendum boðið uppá léttar veitingar að keppni lokinni. 

Veitt verða verðlaun fyrir 3 efstu sætin og allir fá þátttökuskjal.
Keppt verður í eftirfarandi flokkum: 
9 ára og yngri     (1-4 bekkur)
10-12 ára            (5-7 bekkur)
13-16 ára          (8-10 bekkur) 

Skráning á staðnum nægir.

--

Ég ætla að fara með nokkur börn á mótið. Brottför frá Þjórsárveri kl.10:00 á laugardagsmorgnuninn. Gott er að hafa með sér smávegis nesti.

Þeir sem vilja far á mótið með mér geta haft samband í síma 860-1895 - fyrstir koma fyrstir fá.

Bestu kveðjur, Ágúst Valgarð

Æfingar veturinn 2014-2015

Eins og kom fram í seinustu áveitu verða æfingar fyrir börn í 5 bekk og eldri kl.14-15 á miðvikudögum í vetur. Fyrsta æfingin verður miðvikudaginn 10.september.

Æfingar fyrir 1-4 bekk verða kl.12:30-14:00 sömu daga - en þær æfingar eru hluti af tómstundastarfi Flóaskóla sem kallast Gagn og gaman. Þessar æfingar byrjuðu í seinustu viku með 14 börnum sem mættu. Þar verður líf og fjör í vetur!

 

Seinasta skákæfing tímabilsins

Skólinn klárast víst á hádegi næsta miðvikudag - og einhverjir nemendur á ferðalagi. Það er því ljóst að seinasta skákæfingin var núna í dag.

Á æfingunni í dag fengu nemendur 44 blaðsíðna útprentaða skákvinnubók með skákæfingum. Við unnum í þessu hefti í dag - og þau taka það svo með sér inn í sumarið. Gott að grípa í það á rigningardögum - sem vonandi verða fáir í sumar :-)

 

Kærar þakkir fyrir samvinnuna um þetta verkefni um skákæfingar, bæði börn og fullorðnir. Ég vil þakka sérstaklega formönnum ungmennafélaganna, Guðmundi fráfarandi skólastjóra Flóaskóla, Huldu deildarstjóra og öðru starfsfólki Flóaskóla fyrir aðstoð og hvatningu.

 

Gleðilegt sumar! 

Æfingar 07 - 10 drottning, riddari og mát

Hér eru nokkur heimaverkefni. Best er að setjast niður með taflsett og stilla stöðunum upp á borðinu. Skoða svo stöðuna og ræða saman um hver lausnin er. 

Æfing 07

Hér á drottningin að ná öllum svörtu peðunum án þess að missa úr leik. Aðeins hvítu drottningunni er leikið (svörtu peðunum er ekki leikið inni á milli).

 Æfing 08

Hér á hvíta drottningin að finna leik til að stoppa svart í að vekja upp drottningu. Aðeins einn reitur er réttur, þar sem hvíta drottningin getur stoppað hvort peðið sem reynir að vekja upp drottningu.

 

Æfing 09 

Hér riddarinn að ná öllum peðunum án þess að missa úr leik, sambærilegt og æfing 07.

 

Æfing 10

Loks eru hér 8 einföld mát. Í öllum stöðunum mátar hvítur með einum leik. 

  

Fréttir af seinustu æfingum

Nú fer að færast fjör í leikinn. Á seinustu tveim æfingum lukum við yfirferð um hvern taflmann fyrir sig og hafa þeir því allir verið kynntir til sögunnar. Þar sem þessi grundvallaratriði eru í höfn getum við nú farið að ræða fleira sem snýr að herkænsku og liðsskipan. Auðvitað kunnu allir krakkanir mannganginn fyrir - en það er engu að síður ýmislegt sem við höfum lært um hvern taflmann, sem á eftir að koma sér vel síðar. 

Ég vil einnig að þið vitið að hegðun og eftirtekt hefur verið til fyrirmyndar. Það hefur t.d. verið ánægjulegt að sjá hvernig þau sem meira kunna hafa sýnt þolinmæði þegar við höfum farið yfir einfaldari atriðin fyrir þá sem minna kunna. 

Til að stikla á stóru um seinustu æfingar þá höfum við t.d. rætt kosti þess að hafa riddara nær miðborðinu, því þá valdar hann miklu fleiri reiti. Einnig höfum við æft okkur smávegis í því að nota kóng í endatöflum. Við erum einnig farin að æfa einföld mát og fjallað smávegis um pattstöður.

Loks erum við búinn að fjalla um hvernig skynsamlegt er að tefla byrjanir. Við erum búin að kynna 5 triði sem er gott að hafa til viðmiðunar í fyrstu leikjum skákar:

 

1. Ná völdum á miðborðinu.
2. Koma mönnunum út eins fljótt og hægt er, ljúka liðsskipan.
3. Hróka eins fljótt og hægt er.
4. Ekki leika drottningunni of fljótt út. 
5. Forðast að leika sama manninum oftar en einu sinni áður en liðsskipan er lokið.

Við tókum svo dæmi um skákir þar sem byrjanir voru tefldar illa eða vel.

 

Núna eru aðeins þrjár æfingar eftir. Á þeim munum leggja áherslu á:

• Reglurnar 5 um byrjanir 
• Upprifjun á því sem komið er - þannig festast atriðin betur í minni
• Að allir í hópnum kunni að máta með tveim hrókum, drottningu eða einum hrók
• Fjalla um gafflanir
• Ef tími vinnst til, leppanir og að máta með tveim biskupum

Ef nægur áhugi er fyrir hendi vil ég gjarnan halda æfingum áfram næsta haust, í samvinnu við Þjótanda og Flóaskóla. Þessar æfingar hafa gengið vel. Bæði ég og börnin skemmtum okkur konunglega. Það væri því afbragð ef það finnst flötur á að halda þessu áfram næsta vetur.

 

 

Æfingin í dag 23.apríl

Náðum góðri æfingu í dag. Rifjuðum upp ýmislegt varðandi biskupinn og kynntum svo drottninguna til sögunnar. Ræddum einnig hvernig skákin er hugaríþrótt. Við taflborðið eru allir jafnir, hvort sem þeir eru stórir, litlir, breiðir eða mjóir.

Fréttir af skákæfingum

Á seinustu æfingu fjölluðum við um biskupinn, auk þess að rifja upp frá seinustu æfingu.

Enginn æfing verður miðvikudaginn 16.apríl - páskafrí. Næsta æfing verður því 23.apríl.

Sumarnámskeið í skák 2014

Skákakademía Reykjavíkur og Skákskóli Íslands efna til tveggja skáknámskeiða í sumar fyrir krakka fædda 2001-2007. Hvort námskeið er vika í senn. 

Smelltu hér fyrir nánari upplýsingar

Við í Forsæti 3 erum búin að skrá Margréti Maríu og Sigurjón Óla á námskeiðið 30.júní - 4.júlí. Ef einhver annar hér í Flóahreppi hefur áhuga þá getum við eflaust samnýtt ferðir, látið okkur vita.

Æfing 04 - 06 - Biskup

Í öllum æfingunum hér fyrir neðan á að finna hvernig hvíti biskupinn getur sett skák á svarta kónginn. Svörtu mönnunum er ekki leikið, en samt má ekki leika hvíta biskupnum á reit þar sem svartur getur drepið hann. Finnið stystu leikjaröðina til að setja skák á svarta kónginn.

Æfing 04

 

Æfing 05

 

Æfing 06